Hysen Memolla do të vazhdojë të jetë pjesë e Egnatias. Mbrojtësi, një nga pikat më të forta të rrogozhinasve në sezonin e fundit do të transferohej në Turqi te Bodrum Spor, por pikërisht kur klubi turk i kishte prerë biletën e avionit, 31-vjeçari e refuzoi për një detaj aspak të parëndësishëm. Klubi turk nuk dëshironte të firmoste kontratën në prani të menaxherit të lojtarit ndoshta për të evituar komisionet.
Këtë gjë lojtari nuk e ka pranuar duke bërë që akordi të sfumohej. Sipas asaj që filtron nga klubi rrogozhinas shitja erdhi me incidentin që ndodhi në ndeshjen ndaj Skënderbeut. Gjatë momentit të zëvendësimit, familjarët e Memollës kanë reaguar keq duke u konfliktuar në tribunë me presidentin Demrozi. Sidoqoftë, palët në këtë pikë duhet të vazhdojnë bashkëpunimin deri në fund të kontratës.