Finalja e Kupës së Shqipërisë do të luhet sot në “Elbasan Arena”, mes Tiranës dhe Egnatias, ora 19:00. Dy skuadra që bashkë me Partizanin kampion, ishin kryefjala e këtij sezoni. Bardheblutën do të kërkojnë të rrëmbejnë një trofe në këtë sezon, fundi i të cilit ishte mjaft i hidhur, për faktin se e humbën titullin kampion në metrat e fundit.
Egnatia, në të dytin sezon në Superiore, do të kërkojë lavdinë duke rrëmbyer një trofe, që do të ishte i pari dhe që do të vuloste një sezon të mrekullueshëm. Një trofe si shpërblimi më i mirë për një skuadër që ka surprizuar gjatë gjithë sezonit në fushën e lojës. Presidenti i klubit rrogozhinas Agim Demrozi e ka të qartë se kërkon Kupën në Rrogozhinë.
“Kupën e duam, sepse si skuadër na duhet një kupë e madhe, ngaqë më parë kemi fituar veç disa kupa të vogla si kampionë të Kategorisë së Dytë dhe të Parë. Tani është radha ta konfirmojmë këtë gjendje. E dua shumë këtë kupë, kam investuar shumë, jam lodhur shumë. Njëkohësisht jam shpresëplotë se do të jetë një finale shumë e bukur. U them gjithë rrogozhinasve të jenë në stadium, sepse nuk do t’i zhgënjejmë.”