Erdenis Gurishta është një nga futbollistët që ka lënë shenjë në vitet e fundit në Superiore. Mbrojtësi shkëlqeu me Vllazninë duke u cilësuar si një nga anësorët e djathtë më të mirë në Shqipëri.
Vjet u transferua në Bullgaria te CSKA 1948 ku firmosi për 3 vite, por përpara se të finalizonte këtë lëvizje, kishte kontakte direkte me Tiranën e Partizanin. Bardheblutë i bënë edhe një ofertë zyrtare, por nuk u arrit gjuha e përbashkët.
Këtë merkato, Tirana do t’i nënshtrohet një revolucioni drastik që sigurisht prek edhe mbrojtjen, pikën më të dobët këtë sezon. Gurishta ditën e sotme ka patur një takim me drejtorin e medias të bardhebluve, Erjon Allarajn.
“Gjithmonë kënaqësi të të takoj vëlla”, shkruan Allaraj në InstaStory-n e tij. Një takim që sigurisht ndez zërat e merkatos me të dyja palët që dikur kanë qenë shumë pranë ‘martesës’.