Peter Idoto Mandela, është afrimi i parë i Dinamos në merkaton e verës. Sulmuesi, ka arritur marrëveshjen dhe në sezonin e ardhshëm, do të luajë në Superiore. 20-vjeçari ishte një nga lojtarët më të spikatur në Kategorinë e Parë, aty ku në 13 ndeshje me fanellën e Luzit, ia doli të shënojë 19 gola në sezonin e fundit.
Paraqitjet e shkëlqyera të nigerianit, nuk kaluan pa u vënë re nga klubet e Superiores, që nisën interesimet për të. Skënderbeu ishte i pari, që tentoi firmën me Itodon, por një marrëveshje dështoi. Nuk arriti akord as Partizani, që gjithashtu e kërkoi para pak kohësh. Nga kjo përfitoi Dinamo, që nisi menjëherë ofensivën dhe mbylli gjithçka për sulmuesin.
Zyrtarizimi nga klubi mungon ende, por lojtari ka nisur stërvitjen me blutë e kryeqytetit. Itodo bëhet afrimi i parë për Dinamon në këtë merkato, ndërsa pritet të pasohet edhe nga lëvizje të tjera të rëndësishme.
Kryeqytetasit, kanë synim titullin kampion për sezonin e ardhshëm dhe për këtë arsye, pritet të bëjnë afrime të bujshme në merkato. Nga skuadra janë larguar edhe disa lojtarë, të cilëve iu përfundoi kontrata dhe palët vendosën të mos rinovojnë.