Erzeni ka fituar ndeshjen e parë të javës së katërt duke mundur në Rrogozhinë Dinamon me rezultatin 2-1. Shijakasit kaluan në avantazh në pjesën e parë me Maliqin, i cili shfrytëzoi mjaft mirë një top në zonë duke e çuar në rrjetë.
Baraspesha erdhi në pjesën e dytë me Zabërgjan, i cili përfitoi nga një top i mbetur në zonë për ta dërguar drejt rrjetës.
Dinamovitët u munduan me çdo kusht të gjenin dhe golin e dytë, por në momentin më të mirë të skuadrës së Di Biagos, ishte Rexhepi që bëri një gafë të pafalshme në zonë, duke i dhënë një 11-metërsh shijakasve, me Kahrimanoviç që nuk gaboi nga pika e bardhë.
Kështu Erzeni merr fitoren e parë të këtij sezoni, duke shkuar në kuotën e 5 pikëve dhe duke u arratisur nga zona e mbijetesës, ndërsa Dinamo vazhdon të vuajë me vetëm tre pikë në katër ndeshje.