Besa po bëhet gati për revolucionin e radhës, në mënyrë që sezoni i 12-të radhazi në Kategorinë e Parë të jetë i fundit dhe Kavaja të futet në hartën e skuadrave elitare të futbollit shqiptar. Largimet kanë qenë të shumta gjatë kësaj periudhe te Besa, por drejtuesit ia kanë besuar sërish ekipin dyshes së trajnerëve Emiljano Çela-Bekim Kuli.
Vetëm tetë futbollistë janë nën kontratë me verdhezinjtë, kështu që “eksodi” parashikohet të jenë i zgjeruar. Pas largimeve të shumta, së fundmi edhe dy titullarë të sezonit të shkuar kanë njoftuar për “divorcin” me Besën. Pikërisht bëhet fjalë për mesfushorin Andri Stafa, si dhe portierin Jurgen Mehidri.
Mesfushori me tipare sulmuese, Andri Stafa, iu bashku besës gjatë merkatos së verës së shkuar, duke pasur edhe aprovimin e trajnerit të atëhershëm të kavajasve, Mirel Josa. Por aventura e tij me kavajasit nuk zgjati më shumë se një sezon, pasi ka qenë vetë lojtari i formuar tek akademia e Tiranës që ka njoftuar përfundimin e bashkëpunimit me Besën. Ja njoftimi i Stafës: “Nuk jam më pjesë e ekipit të Besës. Falënderoj presidentin, stafin dhe tifozët për këtë sezon”.
Portieri Jurgen Mehidri e nisi sezonin 2024-2025 si titullar te Besa, por në pjesën e fundit të kampionatit ai u ul në stol, pasi drejtuesit i dhanë shansin e aktivizimit portierit Ahmetaj. Edhe për portierin Mehidri ka marrë fund aventura në Kavajë, ku ka qenë vetë lojtari që ka njoftuar për “divorcin”. Ja njoftimi i portierit 27-vjeçar: “Nuk jam më pjesë e ekipit të Besës. Faleminderit Besa”. Te Besa janë larguar gjithashtu, Greca,Goxhaj,Migone, ndërsa Frashëri është një tjetër që mund të ndërpresë bashkëpunimin me kavajasit.