Kryetari i Grupit Parlamentar të Partisë Demokratike, Gazment Bardhi ka folur lidhur me Lulzim Bashën dhe garën e tij për të marrë sërish drejtimin e kësaj force politike.
Në një intervistë për “Now me Erla Mehillin” në Euronews Albania, Bardhi tha se ndonëse ka qenë mbështetësi i tij, tani nuk e mbështet në rrugën që ka marrë pasi mendon se është një rrugë e gabuar e cila do të dëmtojë Partinë Demokratike dhe interesat e demokratëve.
Më tej, ai theksoi se di disa të vërteta për Bashën të cilat për momentin i mban të fshehta.
Bardhi shton se luftën e ka me Edi Ramën dhe nuk ka në plan të merret me askënd tjetër, por në rast se duan të hedhin baltë mbi të, ai do i përgjigjet baltës me të vërteta.
“Kam një lloj frenimi në aspektin njerëzor ndaj Lulzim Bashës sepse kam qenë bashkëpunëtori i tij më i ngushtë. A e mbështes në këtë rrugë që ka hyrë?
Jo nuk e mbështes. Mendoj që është një rrugë e gabuar, mendoj që është një rrugë që e dëmton Partinë Demokratike të Shqipërisë, dëmton interesat e demokratëve.
Baltën unë e përball me të vërteta të cilat për momentin i mbaj të fshehta dhe s’ka lidhje me kartë rezervë, por ka lidhje me objektivin. Objektivi im dhe beteja ime është me Edi Ramën.
Nëse dikush ka betejë me mua, të mos fshihet pas shkrimeve të rreme, të cilat unë e di se kush i shkruan. Të dalë me zë dhe me figurë që të kem unë mundësi t’i përball me të vërtetat,” – u shpreh Bardhi.