Sapo ka ikur mesdita në veri të Londrës dhe Selamet Mehmetaj pi një Cola teksa tregon me qetësi se si funksionon tregtia e tij shumë milionëshe e kanabisit.
Sipas Daily Mail, baroni i drogës – Mercedes-Benz i të cilit kushton 50,000 funte dhe është pa targa të përparme është i parkuar aty pranë – ka rënë dakord të takojë klientë të rinj të mundshëm pasi ata e kontaktuan atë përmes faqes anonime në Instagram që reklamon biznesin e tij.
I pashqetësuar nga të tjerët që pinin dhe këmbësorët kalimtarë në qendrën e qytetit Wood Green, 28-vjeçari shpjegon se si çdo muaj ai furnizon tregtarët në të gjithë Mbretërinë e Bashkuar me 2,500 bimë kanabis.
Dhe ai e bën shumë të qartë se çfarë ndodh me ata që guxojnë ta “tradhtojnë”, duke u mburrur me faktin se si ia preu dy gishtat një klienti që nuk e paguante – dhe i mori paratë e tij para se t’i priste njërën këmbë.
Ai thuhet se është i njohur si “Djalli”, i cili grumbullon miliona nga biznesi i tij i shitjes me shumicë të drogës.
Në faqen e tij në Instagram të titulluar ‘Albanian Blood’, Mehmetaj ka treguar fabrikat e tij të kanabisit dhe ka postuar video për të nxjerrë në pah llojet që janë në dispozicion, duke inkurajuar klientët e rinj të kontaktojnë, shkruan Daily Mail.
Dhe siç vë në pah mediumi britanik, Instagram e hoqi faqen pasi u kontaktua nga Daily Mail.
Por ndërsa faqja ishte ende Live, gazetarët e fshehtë të Daily Mail të paraqitur si klientë kontaktuan përmes aplikacionit të mediave sociale.
Pas kësaj, Mehmetaj i takoi pranë shtëpisë së tij në Palmers Green.
Gjatë takimit ai ishte mburrur se iu shmang akuzës për armë zjarri, pavarësisht se policia kishte gjetur një armë ruse që e kishte futur kontrabandë nga Shqipëria dhe e kishte fshehur në makinën e tij, duke thënë se avokati i tij kishte përgatitur një histori duke pretenduar se arma nuk ishte e tij.
Veç kësaj ai ka treguar se si i shpenzoi paratë nga biznesi i tij i paligjshëm për një mënyrë jetese, duke përfshirë një Mercedes-Benz CLA AMG prej 50,000 funte, një Audi RS7 – të cilin e drejton me mbi 200 mph në autostrada duke përdorur targa false – dhe një makinë Formula 3 për gara jashtë pistës.
Ai kishte qeshur ndërsa përshkruante se si policia “humbi” një sasi kokaine, kanabis dhe plumba kur ata bastisën banesën e tij me pesë dhoma gjumi, sepse nuk arritën të kontrollonin një dhomë.
Siç shkruan DailyMail më tej, Mehmetaj, i cili është nga qyteti verior shqiptar i Tropojës, ka zhvilluar një perandori të lulëzuar droge në Mbretërinë e Bashkuar – dhe një faqe në mediat sociale për ta promovuar atë.
Edhe pse faqja e tij u fshi në Instagram – e titulluar “Albanian Blood”, që do të thotë “Gjak shqiptari” – faqet e tjera të tij, të cilat nuk promovojnë kanabisin, mbeten aktive.
Pasi një gazetar i fshehtë i dërgoi një mesazh llogarisë “Albanian Blood” duke pyetur për blerjen e kanabisit me shumicë, ai pranoi të takohej në një kafene, thekson Daily Mail.
Pasi mbërriti me Mercedes-Benz CLA AMG të tij të errësuar, ai tregoi se si biznesi i tij kishte lulëzuar gjatë bllokimit (për shkak të coronavirusit) sepse të gjithë ishin në shtëpi.
Mehmetaj shpjegoi se si çdo muaj ai rrit deri në 2500 bimë kanabis – të cilat ai i quan ‘foshnjat’ e tij – duke përfshirë ‘stardog’ me forcë të lartë dhe ‘tortën e dasmës’ super të fuqishme.
Ai tha se shet çdo bimë për 10-15 funte.
Sipas Mehmetajt, biznesi i bën atij miliona në vit, por kur shitet nga tregtarët, bimët do të vlejnë dhjetëra apo edhe qindra miliona funte.
Ai tha se ‘më telefonojnë shumë njerëz’ për porosi, duke shtuar: ‘Sot më thirrën dhe dikush kërkon 200, dikush kërkon 300’.
‘Kam njerëz që marrin çdo muaj nga unë për magazinat e tyre’.
Instagrami luajti një rol të madh në reklamimin e biznesit të tij, tha Mehmetaj, duke shpjeguar se askush nuk e dinte se ai qëndronte pas faqes “Albanian Blood” e cila kishte pothuajse 1000 ndjekës.
Për të nxitur trafikun drejt tij, ai postoi lidhje dhe fotografi nga llogaria në një faqe tjetër në Instagram me 12,000 ndjekës.
Në profilin e tij në internet, ai quhet ‘Djalli’, tha ai, sepse ‘kështu më quajnë’.
Ai tregoi se nëse dikush thyen besimin e tij ‘është shumë keq’ dhe në një paralajmërim të fshehtë, përshkroi trajtimin e tij ndaj një klienti që nuk paguante.
Postimet në rrjetet sociale nga Mehmetaj paralajmërojnë gjithashtu për dhunën e tij, me një video shqetësuese në Facebook të postuar në mars, ku shfaqet një burrë me fytyrë të gjakosur duke qarë teksa goditet në pjesën e pasme të makinës.
Një koment shoqërues thotë: ‘Kjo është ajo që ndodh me ata që përpiqen të na vjedhin’.