Babai i 10-vjeçarit, i cili në datën 15 gusht u aksidentua për vdekje nga ambulanca në Kakavijë mes lotësh ka treguar si ka ndodhur ngjarja. Me lot në sy dhe tepër i ngarkuar emocionalisht, Nik Ndoi thotë se ambulanca e ka hedhur djalin e tij 30 metra, më pas e ka shtypur me të dyja rrotat.
Në një rrëfim për emisionin “Me Zemër të Hapur” në News24, babai tregon momentet e vështira, kur në spital djali e tij ishte i vdekur, ndërkohe që edhe bashkëshortja ishte me oksigjen në gjendje të shokuar.
Thotë se djali i tij u dërgua me një tjetër ambulancë në spital, ndërsa askush nuk e ka marrë në telefon nga shteti për ta ngushëlluar.
PJESË NGA BISEDA
Çfarë mbani mend nga momenti tragjik
Babai i 10-vjeçarit: Mbaj mend që çuni ishte përbri makinës dhe vinte një ambulance me shpejtësi të madhe. Kur e kam parë ambulancën ishte shumë larg, ishte aq me shpejtësi saqë nuk arrita ti thërrisja dot çunit që mos lëvizte. Pasi e goditi dhe e hodhi 30 metra, e shtypi me të dyja rrotat e krahut të majtë.
Çuni kishte dalë nga makina dhe po rrinte. Ai ka qenë në vijën ndarëse të rrugës. Çdo gjë e kemi parë me sytë tanë.
Çfarë ndodhi me ambulancën sepse po transportonte një të sëmurë?
Babai i 10-vjeçarit: Unë nuk e vërtetoj këtë. Thoshin që ambulanca merret njerëz dhe i çonte në doganë. Ka edhe video që policia ia merrte makinën dhe ja çonte në doganë. Unë nuk i kam parë me sytë e mi nëse kishte apo nuk kishte njeri brenda në ambulancë.
E takove shoferin?
Babai i 10-vjeçarit: Ai ka zbritur, unë nuk e kam parasysh shoferin, por nuk e di ishte ai që çoi çunin tek spitali, apo ishte dikush tjetër.
Si ishte djali pas goditjes?
Babai i 10-vjeçarit: Ishte i mbaruar, shpresat ishin të pakta për të jetuar.
Shoferi i ambulancës, apo persona të tjerë ju kanë kontaktuar për të shprehur ngushëllime?
Babai i 10-vjeçarit: Asnjë, asnjeri, as nga shteti dhe askush nuk më ka marrë në telefon.
Çfarë ndodhi më pas?
Babai i 10-vjeçarit: Vajtën në spital, na thanë që çuni nuk ishte në jetë. Unë po merrja çunin tjetër. Më ka çuar policia në spital. Në ambulancë që e kanë çuar çunin, nuk kishte as oksigjen.
Çfarë thotë bashkëshortja juaj, kur ka ardhur vdekja?
Babai i 10-vjeçarit:Nuk ka qenë në gjendje për ta kuptuar, sepse ka qenë e shokuar. Kur shkova në spital e pyeta infermieren, a shpëtoi çunin, po më tha.
Nuk dija si t’ia thoja çunit tjetër, ndërkohë nga ana tjetër nusja ishte e shokuar në oksigjen. Ishte një moment tepër i vështirë, i papërballueshëm.