Policia e Tiranës ka sekuestruar dhjetra doza me lëndë narkotike kokainë, e një sasi me kanabis në operacionin e koduar “Stacioni i fundit”.
Në pranga u vu poseduesi dhe shpërndarësi i lëndës narkotike, shtetasi A. H., 47 vjeç, banues në Tiranë.
Nga ana e Seksionit për Hetimin e Narkotikëve janë siguruar informacione në rrugë operative se në banesën e tij në rrugën “Aleksandër Moisiu” posedonte lëndë narkotike kokainë dhe kanabis.
Mbi bazën e këtyre informacioneve, nga ana e Seksionit për Hetimin e Narkotikëve është ushtruar kontroll fizik ndaj tij dhe në banesë, ku Policia gjeti dhe sekuestroi në cilësinë e provës materiale rreth 58 gramë lëndë narkotike kokainë, një pjesë e së cilës ishte ndarë në doza gati për shitje, një sasi me lëndë të dyshuar kanabis, shuma të ndryshme parash, 2 peshore dhe 4 aparate celular.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore.