Alfred Deliallisi, trajneri i cili mori drejtimin e Korabit më datë 6 mars duke e drejtuar skuadrën në shtatë ndeshjet e fundit të sezonit, arriti të mbante në Kategorinë e Parë ekipin dibran dhe puna e tij është vlerësuar nga drejtuesit e klubit nga Peshkopia, që njoftojnë se kanë rinovuar kontratën me trajnerin Alfred Deliallisi, që do të drejtojë Korabin edhe në sezonin 2025-2026.
POSTIMI I KORABIT
“Pas një viti të vështirë ku arritëm objektivin kryesor dhe shpëtuam sezonin me shumë dinjitet, Klubi i Futbollit Korabi është i lumtur të njoftojë rinovimin e kontratës me trajnerin tonë, Alfred Deliallisi. Sot, pas një vizite në qytetin tonë të Peshkopisë dhe ambientet sportive të klubit, u zhvillua prezantimi zyrtar i trajnerit dhe u shpalosën objektivat ambicioze për sezonin e ardhshëm. Me punën e përbashkët dhe përkushtimin, jemi të bindur se do të arrijmë suksese edhe më të mëdha.
Sezoni i ri i Superligës shqiptare do të nisë më 23 gusht dhe do të përfundojë me 24 maj të 2026. Komisioni i Ligave dhe Garave në FSHF ka vendosur gjithashtu datat për të gjithë kompeticionet e tjera, me kategorinë e parë që do të ketë të njëjtat data si Superliga, ndërsa Kategoria e Dytë nis me 27 shtator 2025 dhe do të mbyllet më 18 prill 2026. Superkupa e Shqipërisë do të luhet më 28 dhjetor 2025, ndërsa Kupa nis me 1 tetor dhe përfundon me finalen e madhe më 13 maj të 2026.